Konpayi telefòn mobil Natkòm te fete madi 7 septanm nan 10 lane depi l ap feraye an Ayiti. Se nan lokal li nan Tijo fèt sa a te fèt. Nan lokazyon sa a, manadjè gwo konpayi telefòn sa a te pwofite lanse yon aplikasyon tou nèf yo rele "Natcom ID". Se te pi bon moman pou te fè kliyan an yo fè konesans ak yon lòt kalib teknoloji hòtpòt ak lòt kalte tandans k ap devlope tout kote sou latè jounen jodi a.
Nan diskou l te fè nan lokazyon sa a, manadjè jeneral konpayi an te fè tèt li anpil bèl konpliman. Li te kontan di ki jan l satisfè anpil pou gwo bourad lajan Natkòm bay Leta Ayisyen. Gouvènè Bank Santral la Mouche Jean Baden Dubois, Chèf Kabinè Direktè Jeneral Konsèy Nasyonal Telekominikasyon an (KONATEL), reprezantan Ministè Edikasyon Nasyonal ak Fòmasyon Pwofesyonèl (MENFP), yo tout te la tou.
Yo te vin kore konpayi telefòn mobil Natkòm ki t ap fete 10 lane sèvis li deja bay nan peyi a. « Jounen jodi a, Natkòm se yon konpayi ki gen yon valè fil kalite siperyè ki deplòtonnen kò l yon ban n kote nan peyi a ». Se sa Mesye Le Van Dai te di. Li te kontinye pale pou l te fè konnen konpayi an gen piplis pase 6,700 kilomèt kab, ki kouvri plis pase 90% nan lavil tankou pwovens nan peyi a, menm nan kote ki pi lwen yo.
Aprè 10 lane sèvis Natkòm di li chaje ak lanbisyon nan dyakout li. Pi gwo responsab konpayi telefòn mobil la te anonse konpayi an gen pou li vin gen pi gwo kalib teknoloji k ap bay sèvis an Ayiti. Konsa l pap pè fè fas kare ak okenn lòt peyi sou latè. « Nou pral kreye yon dezyèm revolisyon an Ayiti. Se revolisyon dijital la ». Se konsan Mesye Dai te kontan pale.
Akò Natkòm ak MENFP
Nan menm lokazyon 10 lane depi Natkòm ap feraye nan peyi a, responsab yo te chwazi pote kole nan bay sektè edikasyon an anpil bourad. Se konsa yo te siyen yon akò ak MENFP. Se te pou adopte yon pwogram espesyal pou sipòte enstalasyon sanitè yo lè yo bay yo yon parennaj sou yon kantite enstalasyon, ki gen ladan tou 20 laboratwa ki gen 25 òdinatè ak tab ak tout chèz.
Pwogram sa a ap gen tout yon koneksyon entènèt 10 Mbps pou chak laboratwa ki gen òdinatè òdinatè ki koute an tou 2,500 dola vèt chak mwa pou 3 lane konsa. Natkòm, dakò pou l fè tout depans pou enstale ak kenbe liy transmisyon yo tenn fas. Pwogram sa a koute $ 2.5 milyon dola ameriken nan valè finansman total li. “Nou espere kout men sa a yo pral pèmèt lekòl yo bay pi bon kalite edikasyon”. Se konsa limewo 1 konpayi an te pale.
"Natcom ID", aplikasyon an bato
Pi gwo otorite nan Natkòm yo te pwofite jou 10 zyèm anivèsè sa a pou yo te lanse yon aplikasyon tou nèf yo rele "Natcom ID". Li pral pèmèt kliyan konpayi an plonje nan teknoloji a tout longè. Aplikasyon sa a pral gen Sinepam: depo nan fim karakteristik pwoteje, N-jwèt: jwèt amizan ak anpil estil. Natbolèt ki se yon lotri elektwonik. Jwenn Zanmi, Konekte Zanmi, Rele (rele): rele, voye yon SMS dirèkteman nan limewo telefòn Natkòm pa aplikasyon an.
Gouvènè Bank Santral la, te fè anpil lwanj pou Natkòm. Mouche Jean Baden Dubois pat pè di konpayi a toujou peye taks li. " Natkòm se youn nan 5 pi gwo konpayi ki toujou peye Leta ". Li t ap eksplike depi li nan tèt Bank Santral la nan lane 2017, Natkòm te kòmanse peye Leta Ayisyen taks jis rive jiska 1,2 milya goud konsa’’.
Li te pwofite ankouraje gwo otorite yo fè tout sa yo kapab pou konpayi an ka rive ateri ak teknoloji dijital pou tout moun ka jwenn. Mesye Dubois di: " Desizyon Leta Ayisyen an pou chwazi Natkòm te bon anpil anpil ".
ekri pa : Louis Nicolas
@louisactualite
( LA )
Comments