Federasyon Òganizasyon Ayisyèn k ap Defann Dwa Moun

Jedi 31 desanm 2021

Federasyon Òganizasyon Ayisyèn k ap Defann Dwa Moun, salye laprès pale, ekri, televize ak an liy pandan l ap pwofite profite okazyon an pou l remèsye yo pou deplansman yo fè pou vin kouvri konferans pou laprès sa nan jounen spesyal sa 31 desanm 2021 an.

Jodi a se dènye jou nan ane 2021 an. Nou ka remake tout fanm Fedofedh pote dèy. Nou pote dèy pou tout frè ak sè nou yo ki tonbe anba bal bandi tout kalite, pou sila yo grangou ak lamizè ap touye, nou pote dèy pou sila kidnaping fè vin dechèpiye. Nou pote dèy pou jèn nou yo ki pa wè espwa pou demen.

Ayisyen k ap viv toupatou sou sotè. Fanm vanyan an Ayitiyo. Nan okazyon fèt finisman ane a Ayiti ap travèse yon moman ki difisil anpil li pat janm konnen nan istwa l. San kontinye koule, pifò Pèp la pa ka fete paske se bandi ak zam ki pran peyia an notaj. Yo anonse konvrefe lè yo vle.

Pou 2021 an, nou fè anpil pèt, anpil nan nou vin pi pòv. Nou pèdi fanmi, zanmi akòz ensekirite, kidnaping, manifestasyon, peyi lòk zwadizan opozan ki t ap batay pou enterè Pèp la. Yo masakre pitit Pèp la. Yo touye prezidan peyi nou, yo chase majorite sèvo peyi a.

Fanm Ayiti yo, fanm Fedofedh yo nan 4 kwen peyi a ap swete tout Ayisyen ki gen responsabilite nan Leta, nan sektè prive, sektè Vodou, klas politik la, legliz, lajenès, Ayisyen ki gen responsablite pote zam legalman ak sila yo ki gen zam ilegal nan men yo, pou yo pran yon ti kras konsyans. Twòp san koule ane sa a , twòp fanm viktim zak kadejak. Twòp moun pèdi djòb yo. Timoun pa ka al lekòl. Twòp sèvo kouri kite peyi a. Twòp moun nan klas moyèn nan vin pi pòv pase Jòb.

Fedofedh swete pou ane 2022 a pote lanmou, sekirite, travay ak solidarite, pou tout Ayisyen. Men pousa fèt fòk chak Ayisyen pratike kilti viv ansanm nan. Fòk nou fòse moun ki nan Leta fòse pran responsabilite yo kòm sa dwa.

Pèp Ayisyen pou ane 2dwa a, Fedofedh mande n pou n kale je nou, pou nou wè kote nou ye, pou finalman nou sòti nan move sitiyasyon nou trouve nou depi yon bon bout tan an.

Fedofedh swete pou fanm yo rekonèt fòs yo lè yo met tèt yo ansanm. Se pou n kanpe ansanm poun di : Nou vle viv tankou moun tout bon !!!

Fedofedh swete pou 2022 an pou Leta pran responsabilte l pou tabli sekirite ak lapè nan peyi a, pou laperèz la chanje kan, pou bonjan eleksyon rive òganize pou renouvle pèsonèl politik ayisyen an, pou n tounen nan lòd konstitisyonèl.

Fedofedh ap pwofite raple PM Ariel Henry se yon akò kite mete l kote l ye a. Manda prezidan Jovenel ta dwe fini 7 fevriye 2022, ki bilan li konte prezante bay pèp la pou yo ka kite l òganize eleksyon pou pèmèt peyi a genyen lòt dirijan pou n respekte prensip demokratik yo paske jiska prezan Fedofedh poko janm wè aplikasyon akò nou te siyen ak PM nan.

Nou menm fanm Fedofedh nou pote dèy pou 2021. Men nap swete limyè pou 2022 a.

Ayiti se yon peyi tankou tout lòt peyi, Fòk nou viv lakay tankou tout moun viv lakay yo

!!!

Se pou Gran Achitèk la nan bonte li beni Ayiti, pwoteje nou, e ban nou limyè ak fòs pou se Pèp la ki pou jwenn viktwa

Ane 2022 a se pou Pèp la!!!

Novia Augustin, prezidant FEDOFEDH.