Federasyon Òganizasyon Fanm k ap Defann Dwa Fanm yo (FEDOFEDH) fè konnen n nan yon moman kote Ayiti ap travèse yon sitiyasyon sosyal, politik ak ekonomik ki malouk anpil. Konsa, FEDOFEDH rankontre laprès jounen jodia pou plizyè rezon. Premyèman se pou fè konnen jan sa ba l anpil pwoblèm poutèt pil vyolans ak enjistis fanm ak timoun Ayisyen yo ap sibi nan Sendomeng.
Dezyèmman pou n ka raple Premye Minis Ariel HENRY, li lè li tan pou l mete kanson nan tay li pou l pwoteje Pèp la kòm sa dwa, sitou fanm ak timoun yo. Yo bouke tande fanm ansent ap mouri lopital paske pa gen gaz, pandan kay vwazen y ap maltrete yo pi rèd. Yo bouke wè ki jan jèn nou yo ki swaf konesans pa ka jwenn bonjan kondisyon pou y al lekòl ak nan Inivèsite.
Depi sou tan Benmbo, fanm toujou viktim tout kalib vyolasyon dwa yo. Tout vi yo se gwo konba. E yo toujou rete djanm pou batay pou dwa yo ka respekte kòm sa dwa. Men, pa bò isit dwa a yo ekziste sèlman sou papye. Yo pa kwè nan vyolans. Yo pito konte sou bat bouch. Men yo pap janm kite kansè dekourajman pote yo ale.
Yo pwomèt tèt yo pou yo kontinye pale fò jiskaske yo resi tande yo. Fòk fanm yo jwenn bon kondisyon sante ak bon jan sekirite pou yo ka al travay. Yo mete yo deyò nan tout kote y app ran gwo desizyon yo, pandan tout vye desizyon y ap pran pou peyi a pa bon pou li. Y ap di PM Ariel Henry se chimen bouton ki mennen maleng. Depi twò lontan medam yo ap sibi tout kalte enjistis ak vyolans tout kalib.
Nou menm nan FEDOFEDH nou te siyen akò yo paske n te wè nan yo anpil pwen ki te ka ride rezoud kèk pwoblèm tankou yon gouvènman kote tout moun ladan l. Yon gouvènman ki t ap pèmet tout moun jwenn yon souf. Yon gouvènman ki t ap respekte kantite fanm ki dwe lonmen lè y ap monte yon gouvènman ki travay pou met lapè ak sekirite. Nou t ap gen lòt KEP ki t ap pèmet eleksyon fèt.
E nan eleksyon sa a yo yo t ap gen lidè ki pou defann fanm ak tifi yo isit tankou lòtbò dlo. Yo konnen 85% ekonimi an repoze sou do fanm yo. Konsa, yo ekzije pou bon jan sekirite tabli nan peyi a pou fanm yo ka kontinye pote manje lakay yo epi fè edikasyon pitit yo. Pou jan sitiyasyon peyi a ye la a, medam yo gen anpil difikilte pou yo pran swen kòd fanmi yo.
Se sa ki pouse anpil nan pitit fanm sa yo al nan gang pou yo ka viv. Se konsa sèl pou yo ka ride fanmi yo paske peyi a pa ofri yo anyen ankò. Se ti jèn sa a yo ki ap fè zak kadejak sou medam yo. Se yo k ap fè popilasyon an monte mòn lesyèl pa do. Se yo ki sèmante yo pap kite lekòl fonksyone. Lè peyi a nan sitiyasyon sa yo, se yo menm fanm ki plis viktim. Alòs n ap mande PM Ariel Henry pou l respekte akò yo te siyen ak li a.
Jèn yo bezwen bon jan pwogram divètisman nan lapè ak sekirite kote Fanm ak tifi ka sikile san kè sote pou pesonn pa fè kadejak sou yo, vyole yo. Yo bezwen yon gouvènman ki pou komanse mete baz pou peyi a rejwenn eskanp figi l. Pou sa fèt fòk aktè politik yo konnen kèlkeswa akò y ap sipòte se Ayisyen yo ye, fòk yo komanse mete enterè ti koulout yo akote pou yo panse ak peyia ak moun afè pa bon yo.
Fanm ak tifi nan gran sid yo bezwen Gouvènman an voye je sou yo anpil. Yo fete 218 lane batay Vetyè, ki sa batay sa a vle di pou yo ? Li lè li tan pou n panse nan enterè tout moun pou n ka sove peyi a. Paske nou te mèt gen lajan nan tout dan, nou te mèt gen 10 nasyonalite jou sa pa bon se Ayiti y ap voye yo retounen. Donk an n fè peyi a tounen yon kote moun ka viv alèz kou Blèz !!! Fanm ak tifi se avni peyi a an n pote kole pou n pwoteje yo.
@louisactualite (LA)
Σχόλια