Nan yon Nòt pou Laprès ki parèt jou ki te madi 11 jiyè a Konfederasyon Nasyonal vodouyizan Ayisyen (KNVA) fè konnen aprè 2 lane depi y ap viv nan yon kondisyon san parèy, Sektè Vodou a leve vwa li byen wo pou l di Pèp la bouke, Peyi a pa kapab ankò ! “Nan non Zansèt nou yo ki te fè Bwa Kayiman an 1791, nou di ase.
Epi n mande prese prese Gouvènman tranzisyon an ak HTC a degaje yo kou mèt Janjak pou yo mete bon jan kondisyon sekirite pou remete peyi sou ray demokratik. Mete KEP a kanpe, fè yon pase men nan Gouvènman an jan Akò 21 desanm 2022 an mande l la”.
Pi devan KNVA kontinye pou l fè konnen se sèl bon jan eleksyon ki kapab pèmèt peyi a sòti nan kriz li ye jounen jodi a. “Sektè Vodou ap fè n sonje se depi nan dat 17 avril 2023 li te fè devwa li lè li te chwazi a travè KNVA, WAYÒM VODOU DAYITI ak ZANTRAY reprezantan li nan Konsèy Elektoral Pwovizwa a (KEP). Nan sans sa, Sektè Vodou a renouvle atachman li ak pèsonaj li te voye kòm sèl reprezantan li nan Konsèy Elektoral Pwovizwa a ki se Mèt Newton Louis St Juste pou onètete li ak konpetans li.
“Sektè Vodou a ap enfòme opinyon nasyonal ak entènasyonal la li tanmen depi plizyè mwa yon kanpay mobilizasyon an favè eleksyon bò kote manm li yo nan tout peyi a. Kanpay sa ap fèt tou bò kote tout sektè ki voye reprezantan nan KEP a pou mande yo fè konsesyon pou Vodou a kapab dirije Konsèy Elektoral la.
Sa fè lontan depi zòt ap majinalize Vodouyizan yo alòske se Nou menm ki piplis nan peyi a”.
Poutèt sa ka rive fèt, Sektè Vodou a ap mande tout lòt sektè ki voye moun nan KEP a pou kanpe dèyè Mèt Newton Louis St Juste kòm Prezidan KEP a pou ka gen bon jan eleksyon kredib, onèt ak demokratik nan peyi a. Sektè Vodou a ap mande pou tout Pitit tè Papa Desalin nan kontinye chita ansanm pou sove Ayiti menm jan Zansèt nou yo te fè sa nan lane 1791 nan gwo Woumble Bwa Kayiman an.
Se nan bon jan chita pale ant Ayisyèn ak Ayisyen pou n sove Ayiti.
Ayibobo !
Viv Vodou,
Viv Ayiti,
Viv pèp Ayisyen.
louisactualite
Ekri ak poste: Louis Nicolas
Comments