Jonas Montes, Journaliste
La 14e édition de la foire annuelle de la VGFAH prévue du 22 au 25 décembre 2023
Comme dit le vieux adage français :"Une fois n'est pas coutume, mais la coutume commence une fois." Les responsables de l'organisation sociale dénommée Vision de la Grande Famille Haïtienne (VGFAH), lancent la 14e édition de la foire annuelle prévue d'organiser au niveau du quartier de Morne Lazarre (Lakou Darbonne), pour les 22, 23, 24 jusqu'au 25 décembre 2023. Au cours du lancement de cette noble activité qui débutera en date du vendredi 22 décembre 2023, les membres organisateurs de la foire envisagent de procéder à la réalisation d'une journée de clinique mobile en vue d'offrir aux fidèles abonnés ainsi que d'autres personnes intéressées un espace où ils pourront venir profiter des soins médicaux suivis de consultation avec peu d'argent.
Cette partie, insérée dans l'article a été rédigée par le bureau de communication de ladite structure afin de retracer l'historicité de la foire du début jusqu'à la toute dernière édition à venir, mais surtout aider les gens à mieux cerner le sens du mot "Solidarité" toujours utilisé comme slogan pour promouvoir la foire de 2010 jusqu'à 2023.
Kisa ki "foire de la solidarité"a?
Tout moun ka sonje ki kantite dega tranbleman tè 12 Janvye a te fè sou moun ak byen nan Mòn Laza. Sitiyasyon an te tèlman grav, pifò moun ki rete vivan yo te oblije deplase paske zòn nan te sanble ak yon senmityè. Gen moun ki te menm di yo p ap janm retounen kote konsa ankò.
Se nan kontèks sa asosiyasyon VGFAH ta pral kreye, paske nou te kwè fòk lavi reprann nan Mòn Laza. Konsa nou te oblije fè tout efò pou ede kominote a travèse moman difisil sa. Nan VGFAH nou te kwè tou fòk nou te jwenn yon fason pou selebre lavi epi chase tout move souvni ane 2010 la te kite nan lespri nou.
Se pou rezon sa nou ta pral deside reyalize yon aktivite ki ka pèmèt tout moun santi ke lavi ap rekòmanse nan kominote a. Se konsa ide fwa a te vini, nan objektif pou selebre lavi, pandan n ap chante, danse, manje ansanm epi prezante bèl pwodwi ki fèt nan peyi a.
Nou te bay fwa tit "Foire de la solidarité" se te yon fason pou fè tout moun sonje solidarite ki te gen nan mitan nou aprè katastwòf terib 12 janvye 2010 la. Men tou nou te vle tout moun konprann ke se pa sèlman lè nou gen pwoblèm pou nou fè solidarite youn ak lòt.
Pandan 13 lane esperyans yo nou te toujou kwè ke se solidarite k ap ede kominote a leve kanpe tout bon vre. Chak ane timoun tankou granmoun toujou ap pare tann randevou sa yo pa vle rate pou anyen. Evènman sa se senbòl solidarite a menm, se yon antistrès, yon soulajman, yon tradisyon, yon eritaj, yon patrimwàn pou pou tout kominote a.
Se pou sa ane 2023 nou vle mouvman solidarite a fè yon pi gwo enpak nan lespri chak ayisyen, isit kou aletranje, sitou moun lakay nou nan Mòn Laza. Sa vle di, nou vle tradisyon sa a voye mesaj solidarite a bay chak Ayisyen ke kriz peyi a frape.
« Ann fè solidarite pou lespwa boujonnen » se tèm nou chwazi pou 14èm edisyon an ane sa, paske nan solidarite nou ka fè bèl bagay. Li enpòtan pou nou sonje ke se solidarite ki te bannou endepandans. Solidarite se tèt ansanm, travay ansanm, viv ansanm. Wi, se ansanm nou fò tout bon. Ansanm nou ka chèche epi pote dlo vin wouze jaden lavi pou lespwa boujonnen. Ansanm nou ka fè rezistans pou tann solèy pwogrè a leve. Ak solidarite la jwa, lapè, lanmou ka blayi sou tout peyi a. Pou sa fèt, sipò chak moun konte nan kominote a, paske se responsabilite nou tout pou mete men nan pat la epi montre sa nou ka fè ak solidarite.
Li klè kè aksyon endividyèl yo toujou mete nou nan plis konfli. Yo afebli nou, yo fè nou pèdi konfyans nan tèt nou, nan avni nou e yo kondwi nou nan dezespwa. Se sa ki lage nou nan ensekirite ki gen jodi a. Jèn yo oblije tonbe nan zak malonèt paske yo vin pa kwè nan ret tann ankò. yo tann twòp. sa fè yo vin san pitye nan aksyon yo.
Lè chak moun panse ak tèt li sèlman, sa kreye plis konfli nan mitan nou chak jou. Konsa nou bay plas ak fristrasyon, divizyon, layèn, vòl, krim ak tout lòt move rezilta. Ann pa kite se sikonstans oubyen yon malè ki fè nou sonje ke zafè kabrit se zafè mouton li ye tou.
Ane sa nap envite chak moun apresye "Foire de la solidarité" nan yon dimansyon ki pi pwofon. Nou swete pou pi plis moun konprann ideyoloji ki te toujou kache dèyè evènman sa a, epi pratike li chak jou nan sosyete a. VGFAH vle fè tout moun sonje ke si nou kontinye fè solidarite pou pwodiksyon nasyonal la, lespwa ap boujonnen. Se menm "Foire de la solidarité" à, men nan yon lòt dimansyon.
Ann fè solidarite nan fanmi yo, nan vwazinaj yo, nan kominote yo, nan tout ayiti e menm nan dyaspora ayisyen an, paske ak solidarite lespwa ka boujonnen.
Kisa w ap fè pou fwa a posib ane sa a?
VGFAH (Vision de la Grande Famille Haïtienne)
Jonas Montes, Journaliste
Comments